MARTURIA GBKP I PULO BORNEO ( KALIMANTAN BARAT )

Siberitaken berita simeriah, Kukalak latih si ndele ‘tah pe lolah, Bas silapayo kerina banci robah, Adi Dibata si mereken serpang luah..........

Berkumandang lagu puji-pujin i tepi dalan Lintas Indonesia-Malaysia tepatna i Jl. Sosok Simpang Tanjung Desa Parindu Kabupaten Sanggau Kalimantan Barat, ± 210 KM i Kota Pontianak nari, ras ± 90 KM ku Entikong perbatasan Indonesia - Malaysia. I jenda pajek sada rumah pertoton i usih-usihna tempa rumah adat karo. Ndauh nari itatap mis erjabab pusuh si natap enda, mbelang kepe juma si man dahin i bereken Dibata.

Ibas tanggal 22 Agustus 2007, penulis seh i kota Pontianak, Pdt. Bonifasius P T. Ginting, S.Th, emekap Pendeta pelayan i GBKP Runggun Pontianak enggo nimai i kepar ruang kedatangan bandara Supadio Pontianak, alu meriah ukur Pdt. Boni Ginting ndudurken tanna nalami penulis, janah minter kami nangkih ku motor sinibaba Pendeta enda. Asum i bas perdalanen denga muat ku rumah Pdt Boni Ginting lit tawaren menghadiri ulang tahun TVRI, sinilakoken ibas malam pertama penulis i Pontianak, maka berngina kuje me penulis, seh senggetna penulis asum ngenehen beka buluh i pajang i bas latar panggung acara HUT TVRI si inti temana emekap Bineka Tunggal Ika, menampilken bermacam-macam budaya. Ibas kedauhen dengga lit i idah kami pulung singuda-nguda make kebaya megara i kadangna uis nipes nambah jilena ras la ketadingen anak perana make jas mamre si motifna ngikuti motif beka buluh. Amin gia udan seh kel mederna lanai ate morah kenca mbegi lagu mbiring mangis ras mejuah-juah i endeken duet Candra Tarigan ras Manda br Barus, ermeriahna ukur penulis mbegi karna si landek ras si rende enda ndai e mekap Permata Katulistiwa GBKP Runggun Pontianak.

Ibas wari saptu, 25 Agustus 2007 kira-kira jam 12:00 WIB penulis raduken rombongen e me, Bp Leo Sembiring si mababa motor, Pt. Ngerteh Tarigan, Dk. Bp. David Sembiring ras Dk. Bp. Fidella Tarigan berangkat menuju daerah PI GBKP i Kab. Sanggau dan sekitarnya. Rombongen seh jam 19:00 WIB i rumah turang seninanta Bp. Juhardi Ginting, enggo sikap perpulungen ngalo-ngalo rombongen, i bas berngi enda ndai sekaligus acara mpetandaken penulis ku perpulungen si lit i kuta Parindu. I kuta enda me penulis i tugasken Bp Runggun GBKP Pontianak kurang lebih empat bulan dekahna guna ndalanken Peraktek Pendidikan Lapangan VI si i selengaraken kampus Universitas Kristen Satya Wacana Fakultas Teologi.

Ibas wari Minggu, 26 Agustus 07 jam 10:00 WIB ibenaken kebaktin Minggu, si mbaba Liturgi eme Dk. Bp. David Sembiring, si nehken kata Dibata eme Pt. Ngerteh Tarigan, ras si mababa puji-pujin eme Dk. Bp. Fidella Tarigan. Perpulungen enda eme salah sada hasil PI siniprogramken GBKP Rg. Pontianak si enggo ndekah i rintis, emaka asum i dapeti penulis bangunen Gereja sangana tahap pembangunen kira-kira 70% denga dung, luas dalam gereja enda e me 10x16 M. Perpulungen enda lenga lit serayan, bagepe PJJ enggo ndekah la ilakoken perbahan lalit serayan. Emaka dahin Penulis selama masa praktek e me kap menyemangati kembali si enggo pernah i lakoken perpulungen

enda janah i arapken ibas proses na banci i pilih serayan si erdahin ibas perpulungen enda.

Selasa, 12 September 2007 ibenaken PJJ pemena kenca enggo ndekah la ilakoken, ingen pulung e me i rumah turang seninanta Bp Yesika Ginting, terem si pulung lit buena enem kalak mamre, pitu kalak moria ras telu kalak anak perana. PJJ ibahan setiap wari selasa jam 17:00 WIB, tambah Mingguna tambah teremna perpulungen si muat bagian ibas PJJ enda, meriah ras semangat kel kerina. Puji Tuhan ibas Minggu, 23 September 2007 ibahan lakon peridiken si pemena i Gereja enda emekap, Fitri br Tarigan ras Alvi Tarigan anak ipupus turang seninannta Stasion Tarigan. Ibas wari enda ka ilakoken pemilihen Pertua/Diaken si jadi serayan i perpulungen enda, siterpilih eme Bp Firman Tarigan sijadi Pertua ringen i Ngabang kira-kira 50 KM i Parindu nari, Bp. Cristhoper Barus sijadi Pertua ringen i Parindu, Nd Fitri br Barus si jadi Pertua ringan i Sanjan kira-kira 13 KM i Parindu nari ras Nd Fedro br Ginting sijadi Diaken ringan i Parindu.

Natal perpulungen enda sinilakoken ibas wari Saptu, 23 Desember 07 i hadiri kurang lebih 160 kalak, ketua panitia e me Bp. Dian Sinulingga, melala acara ibahan siberkesanna emekap puji-pujin ras tarian GBKP Simalem sinitampilken KA/KR nari simbabaisa eme Penulis sendiri. Pagina ibas wari Minggu ilakoken lakon penagkuhen Pertua/Diaken siterpilih guna ngelanjutken pelayanen GBKP i taneh Borneo. Amin gia ndauh ringen sirang i taneh karo nari, la terlupaken GBKP simalem enda, bageme ukur perpulungen si lit ibas kuta Parindu ras sekitarna. Marilah si sampati turang senina nta enda salu toto ras dukungen sideban gelahna tahun Marturia enda banci erbahan GBKP tambah dewasana dalam bersaksi i tengah-tengah doni enda. Tuhan si masu-masu pelayanenta kerina. Salam kasih penulis man banta kerina. Bujur ras mejuah-juah. Amin..

(Rocky Marchiano Tarigan)